Reciteercollege De Harmonie 2026: 'Soere molke'

De Harmonie spilet op freed 13 en sneon 14 febrewaris it stik ‘Soere molke’:

Suzan is foar de safolste kear yn de trein stapt om nei har âlde heit te reizgjen, dy’t foar de safolste kear ‘hurd achterút’ giet. Har soan Wouter is dizze kear by har. Wouter is in jonge studint dy’t in haat-leafde-ferhâlding hat mei syn mem, sy hat him allinne grutbrocht en woldat witte ek. Wouter kin dêr mei in soad humor op reagearje. De âlde heit wurdt al jierren fersoarge troch Jet, de wat wrâldfrjemde suster fan Suzan. Jet is de iennige fan de famylje dy’t noait troud is. Jet hat dizze kear ek har broer Viktor op de hichte brocht dat heit ‘hurd achterút’ giet. Dizze Viktor is goed tweintich jier lyn nei Amearika ferhuze om dêr de hannel fan syn heit, túnkabouters, fierder út te bouwen. Suzan is poer as se heart dat Viktor ek komt. Nei Viktor syn kommen is de gesellichheid fier te sykjen en komme der moai wat âlde kij út de sleat en wurde der wat âlde famylje-geheimen opreakele. De jongerein, Wouter en Ellen de dochter fan Viktor, sjogge der wat lichter tsjinoan en dat helpt net foar de sfear.

Wy hoopje jo te sjen en der in geselliche jûn fan te meitsjen mei elkoar, wês wolkom!